Matarmenning Klambra

Í boði er hefðbundinn heimilismatur með úthugsuðu næringargildi. Athugið að lýsi er ekki gefið í leikskólanum.  

Morgunverður: Á mánudögum, þriðjudögum og fimmtudögum er hafragrautur í boði. Á miðvikudögum fá börnin Cheerios og Ab-mjólk. Á föstudögum fá börnin ristað brauð með osti og smjöri.

Boðið er upp á morgunverð frá kl. 8.30 til kl. 9.00. Þá er best að allir séu komnir í hús því þá hefst hinn eiginlegi skóladagur. Þurrkaðir ávextir eru alltaf í boði með morgunmat, bæði með hafragraut og ab-mjólk. Ekki er boðið upp á púðursykur. Ef barn er með fæðuofnæmi er komið til móts við þarfir þess. Mælst er til þess að foreldrar skili inn læknisvottorði um ofnæmi.

Á öllum deildum er föst ávaxtastund á morgnanna.

Hádegismatur: Á Klömbrum er eldaður fiskur tvisvar í viku, kjötréttir um það bil tvisvar í viku og súpa einu sinni í viku. Öðru hvoru eru grænmeti/baunaréttir fyrir alla. Ávallt er ferskt grænmeti með matnum, hrátt eða soðið. Vatn er í boði með öllum mat og mjólk er í boði fyrir þá sem vilja með síðdegishressingunni.

Hádegismatur byrjar 11.15. Allar deildir byrja að borða á sama tíma.

Síðdegishressing: Nýbakað brauð sem bakað er á staðnum, með hreinu smjöri, áleggi og grænmeti og/eða ávöxtum. Síðdegishressingin byrjar kl 14:30.

Síðdegisávaxtahressing: Ávextir/grænmeti er í boði fyrir börn sem ljúka skóladeginum klukkan 16:45. 

Matarmenning Klambra

Veturinn 2015- 2016 hófum við á Klömbrum undirbúning að breytingu á matartímanum í svokallaða Matstofu. Við tókum leikskólann Aðalþing okkur til fyrirmyndar. Aðalþing hefur verið með Matstofu fyrirkomulagið síðan 2012 við góða raun.  Hugmyndin hjá Aðalþingi var að brjóta upp hinar hefðbundnu nálganir í matmálstímum leikskóla sem byggjast meðal annars á því að hvert barn situr í sama sæti og situr þar til öll börnin eru búin að borða. Þessi bið getur reynst börnum oft löng og erfið.  Aðalþing vildi skapa betri matarmenningu fyrir börnin svo að upplifun barnanna myndi vera jákvæð.

Áhersla Aðalþings var:

  • að börn fengju val um hvar þau vildu sitja
  • að vinir vilji/fái að sitja saman í matmálstímum
  • að börnum líði vel í matmálstímum
  • að tekið sé tillit til þess að einstaklingar séu mis-lengi að borða.
  • að taka tillit til fjölbreytileika.
  • að börnin læri að þekkja sitt eigið magamál.
  • að fá álit barnanna á hráefni og máltíðum.

Þegar börnin fá val um hvar þau vilja sitja þá ýtir það undir valdeflingu þeirra sem byggist á að hafa frelsi til athafna, vald til að gera og vald til vera.  Þannig er einblínt á styrk þeirra í stað veikleika. Með valdeflingu er átt við að einstaklingarnir geri sér grein fyrir hæfni sinni og rétti til þess að bregðast við og hafa áhrif á kringumstæður sem þeir eru í og læri að nýta sér þessa hæfni. Til að mynda hæfni þeirra til að velja sér mat, skammta sér sjálf, velja hvar þau sitja, borða sjálf, meta hve langan tíma þau þurfa til að borða og ganga frá eftir sig. Valdefling eyðir tilfinningu um vanmátt, hjálparleysi og vonleysi.

Hlaðborð í matstofu stuðlar að valdeflandi aðstæðum fyrir börn ef þeim gefst tækifæri til að velja sjálf, hvað af hráefninu þau vilja borða. Barnið setur saman sína eigin máltíð á diskinn sinn. Það eru meiri líkur á því að barnið borði vel ef það velur matinn sjálft  og er treyst í verkið. Með þessu lærir barnið að hlusta eftir eigin magamáli og bera virðingu fyrir mat. Hlaðborð í matstofu kennir börnum líka að bíða eftir að röðin komi að þeim og að eiga samræður við skólafélagana undir hollri og ljúffengri máltíð.

Reynsla Klambra

Eftir mikla undirbúningsvinnu þá breyttum við í Klömbum matsalnum okkar í matstofu í janúar 2016.  Nokkrir byrjunarörðugleikar áttu sér stað: t.d. komumst við að því að með því að þeyta smjörið í hrærivél áður en það er sett fram eiga börnin auðveldara með að smyrja brauðið sitt sjálf. 

Börnin voru mjög ánægð með þetta fyrirkomulag en þetta reyndi mikið á kennarana. Upplifun kennara var sú að þeir væru að missa tökin eða stjórn á aðstæðum.  Það reyndi meira á kennara að aga sjálfa sig en að aga börnin. Kennarar mega ekki tala saman, það á að vera rólegt og kennarar þurfa að hafa alla athygli á börnum sem sitja þar sem þau vilja en ekki þar sem kennari ákveður að þau eigi að sitja. En þetta kom allt með kalda vatninu. Núna hefur skapast ákveðin rútína í matsalnum. Börnin vita að það er ákveðið frelsi í matsalnum og að reglurnar eru fáar en skýrar. Til dæmis er regla að börnin ræði ekki saman á milli borða. Ef börn gera það þá er þeim boðið að færa sig um set.  Kennarar þurfa oft að ræða við börnin að fá sér mátulega mikinn mat á diskinn og fara frekar aftur á hlaðborðið ef þau vilja meira.  Kennarar hvetja börnin líka til að smakka matinn. Kennarar gefa börnum á móti ákveðið frelsi og frið til þess að ræða saman við sína jafnaldra um mat, vináttu og menningu.

Matstofa Klambra hefur gefið góða raun. Börnin njóta sín í matstofunni í félagsskap skólafélaga sína. Valdefling barnanna er sýnd þolinmæði og virðing.

Prenta | Netfang